Radio Fortune Africa -Na Cantona Joseph

https://zeno.fm/radio/radio-fortune-africa

Vyombo vya habari vya serikali ya Korea Kaskazini vimesema makombora mawili mapya ya ulinzi wa anga yamerushwa katika jaribio lililosimamiwa na kiongozi wa nchi hiyo Kim Jong Un.

Silaha hizo zilikuwa na “uwezo wa hali ya juu zaidi” na zilitumia “teknolojia ya kipekee”, Shirika la Habari la Korea (KCNA) lilisema, bila kuongeza maelezo.

Uzinduzi huo, uliotekelezwa siku ya Jumamosi, “ulithibitisha kwamba sifa za kiteknolojia za aina mbili za makombora zinafaa sana kuharibu shabaha mbalimbali za angani” zikiwemo ndege zisizo na rubani na makombora ya masafa, KCNA ilisema.

Jaribio hilo linakuja saa chache baada ya Korea Kusini kuthibitisha kuwa ilifyatua risasi za onyo Jumanne kwa wanajeshi wa Korea Kaskazini ambao walivuka kwa muda mfupi eneo lisilo la kijeshi (DMZ) linalotenganisha nchi hizo.

Urusi yalaumu shambulio la Ukraine kwenye eneo la kinu cha nyuklia wakati Kyiv ikiadhimisha siku ya uhuru

Moto umezimwa katika kinu cha nyuklia katika eneo la Kursk magharibi mwa Urusi na kikosi cha ulinzi wa anga kimeidungua ndege ya Ukraine isiyo na rubani, maafisa wa Urusi wamesema.

Ndege hiyo isiyo na rubani ililipuka ilipoanguka na kuharibu transfoma, lakini viwango vya mionzi vilikuwa vya kawaida na hakukuwa na majeruhi, chapisho kutoka kwenye programu ya kutuma ujumbe Telegram ilisema.

Shirika la Kimataifa la Nishati ya Atomiki la Umoja wa Mataifa (IAEA) limetoa wito mara kwa mara kwa Urusi na Ukraine kujizuia kwa kiwango cha juu kuzunguka vifaa vya nyuklia katika vita hivyo.

Ukraine inaadhimisha siku yake ya uhuru siku ya Jumapili, ambayo inaadhimisha tangazo la uhuru wa nchi hiyo kutoka kwa Umoja wa Kisovieti mnamo 1991.

Serikali ya Uingereza imetangaza kuwa bendera za Ukraine zitaonekana juu ya Downing Street siku ya Jumapili kwa ajili ya kuadhimisha kumbukumbu hiyo.

Waziri wa Ulinzi wa Uingereza John Healey amesema Uingereza “inaongeza” uungaji mkono wake kwa Ukraine “katika siku hii maalum kwa ajili ya uhuru na demokrasia ya watu wa Ukraine”.

Wizara ya Ulinzi imetangaza kwamba wataalam wa kijeshi wa Uingereza wataendelea kutoa mafunzo kwa wanajeshi wa Ukraine hadi angalau mwisho wa 2026, na kuongezwa kwa Operesheni Interflex.

Operesheni Interflex ni jina linalopewa programu ya mafunzo ya Jeshi la Uingereza, ambayo imeundwa ili kuendeleza na kuandaa wanajeshi wa Ukraine kupambana na wavamizi wa Urusi wa nchi yao.

All Rights Reserved © The Cantona Group PLC||2025