Radio Fortune Africa -Na Cantona Joseph

https://zeno.fm/radio/radio-fortune-africa

Baraza la Bunge la juu la Urusi, limeidhinisha mkataba wa kimkakati kati ya nchi hiyo na Iran.

Mkataba huo ni wa miaka 20, na unalenga kuimarisha ushirikiano wa kisiasa, kijeshi na kiuchumi kati ya mataifa haya mawili.

Rais wa Iran, Masoud Pezzekian, na mwenzake wa Urusi, Vladimir Putin, walitia saini mkataba huo mwezi Januari mwaka 1403 kulingana na kalenda ya Kiajemi, siku tatu kabla ya kuapishwa kwa Rais wa Marekani, Donald Trump.

Mnamo Aprili 9, Bunge la Urusi (Duma) lilipitisha mkataba huo wa ushirikiano wa kimkakati, ambao unahusu masuala ya kisiasa, ya kijeshi na ya kiuchumi kati ya Urusi na Iran.

Mfumo wa kisiasa wa Urusi una mabunge mawili: Duma ya Taifa (Baraza la chini), lenye wajumbe 450 wanaochaguliwa moja kwa moja na wananchi, na Baraza la Shirikisho (baraza la juu), linalojumuisha wawakilishi kutoka majimbo na jamhuri mbalimbali za Urusi.

Duma ndiyo yenye mamlaka ya msingi ya kutunga sheria, ilhali Baraza la Shirikisho lina wajibu wa kuidhinisha sheria, kushughulikia masuala ya usalama na sera za kigeni.

Wakati wa mjadala wa kuidhinisha mkataba huo katika Duma, Naibu Waziri wa Mambo ya Nje wa Urusi, Andrei Rudenko, aliwaeleza wabunge kuwa, kwa mujibu wa mkataba huo, iwapo taifa mojawapo litavamiwa, taifa lingine halitakuwa na wajibu wa kutoa msaada wa kijeshi.

Kauli hiyo ilitolewa sambamba na vitisho vilivyotolewa na Rais Trump dhidi ya Iran, akisema Marekani ingeishambulia endapo hakutafikiwa makubaliano mapya kuhusu mpango wa nyuklia wa taifa hilo.

Aya ya tatu ya mkataba huo inaeleza kwamba Urusi na Iran hazitatoa msaada wa aina yoyote kwa mataifa yatakayoshambulia upande mwingine wa mkataba, wala kuisaidia nchi yoyote mshambuliaji.

Tangu kuanza kwa uvamizi wa Urusi nchini Ukraine, mahusiano kati ya Moscow na nchi kama Iran, China, na Korea Kaskazini yameimarika kwa kiwango kikubwa.

Wakati huo huo, mataifa ya Magharibi pamoja na Ukraine yameituhumu Iran kwa kuiuzia Urusi ndege za kijeshi zisizo na rubani zinazotumika katika mashambulizi ya kujitoa mhanga. Iran imekana tuhuma hizo.

Kusainiwa kwa mkataba huu wa muda mrefu kati ya mataifa mawili yanayokabiliwa na vikwazo vikubwa kutoka mataifa ya Magharibi kumeibua tahadhari miongoni mwa baadhi ya mataifa yenye ushawishi duniani.

Mbali na Urusi, Iran pia imeingia katika mkataba wa kina wa miaka 25 na China, wenye malengo yanayofanana ya ushirikiano wa kimkakati.

All Rights Reserved © The Cantona Group PLC||2025