Radio Fortune Africa -Na Cantona Joseph

https://zeno.fm/radio/radio-fortune-africa

Nchini Kenya, mashirika mawili ya kiraia yamewasilisha rufaa kwa mahakama mnamo Alhamisi Januari 2 ili suala la utekaji nyara lifikishwe mbele ya Mahakama ya Kimataifa ya Uhalifu. Kituo cha Mathare kwa ajili ya Haki ya Kijamii na Kituo Cha Sheria wanaitaka Mahakama Kuu ya Milimani jijini Nairobi kuamuru mwanasheria mkuu wa nchi kuwasilisha kesi katika mahakama ya Hague.

Mashirika hayo mawili yanataka mahakama nchini Kenya itambue kuwa utekaji nyara unaotekelezwa na polisi unawakilisha uhalifu dhidi ya ubinadamu. Kulingana na mwanasheria wao, Wakili John Khaminwa, “Ibara ya 7 ya Mkataba wa Roma inazingatia kwamba kitendo cha watu kutekwa na kutoweka, kinapotumiwa kama chombo cha kisiasa cha ukandamizaji, ni uhalifu. “

Kwa upande mwingine, mashirika hayo mawili yanashutumu Polisi wa taifa wa Kenya kwa kutokuwa na uwezo wa kuchunguza utekaji nyara huu. “Mkuu wa polisi mwenyewe alikiri, (wiki iliyopita) ni wazi kwamba polisi wanashindwa katika kutekeleza majukumu yao” inahitimisha taarifa yao kwa vyombo vya habari.

Hali mbaya iliyokithiri

Kwa mujibu wa Gacheke Gachihi, mratibu wa Kituo cha Mathare kwa ajili ya Haki ya Kijamii, utekaji nyara wa washawishi sita kwenye mkesha wa Krismasi ni hali mbaya ambayo imekithiri. “Tumekuwa tukirekodi visa vya watu kutoweka, uhalifu unaofanywa na polisi kwa zaidi ya miaka kumi na hakuna kilichobadilika. Ni tatizo la kimfumo,” anabainisha.

Mkuu wa polisi na katibu wa baraza la mawaziri la Wizara ya Mambo ya Ndani waliitwa na mahakama mnamo Januari 8 kuripoti kuhusu hatima ya wale waliotoweka mkesha wa Krismasi.

All Rights Reserved © Cantona Group PLC||2024