Radio Fortune Africa -Na Cantona Joseph

https://zeno.fm/radio/radio-fortune-africa

Karibu katika Matangazo yetu ya jioni moja kwa moja kutoka Communication Center. Tumekuandalia mengi ikiwa ni pamoja

Muhtasari

• Kesi 500 za ubakaji dhidi ya wanawake zaripotiwa Sudan
• India Wanne wafariki katika ghasia za uchunguzi kuhusu msikiti nchini India
• Lithuania Mtu mmoja afariki dunia, watatu wajeruhiwa katika ajali ya ndege ya mizigo Lithuania
• Urusi na Ukraine Muingereza atekwa akiipigania Ukraine
• Israel na Hezbollah Hezbollah yarusha makombora ndani ya Israel baada ya shambulizi la Beirut
• Uhamiaji haramu Takribani watu 24 wapoteza maisha baada ya boti mbili kuzama pwani ya Madagascar
• Pakistan Makumi ya watu waliuawa katika ghasia za kidini Pakistan

Naam,Natumai U buheri wa afya popote pale ulipo duniani kwa mwoyo mkunjufu na mikono miwili Hujambo na karibu katika matangazo yetu Afrika Leo Mchana ya moja kwa moja Jina langu ni Cantona Joseph

Kesi 500 za ubakaji dhidi ya wanawake zaripotiwa Sudan

Wizara ya Mambo ya Nje ya Sudan imewashutumu Wanamgambo wa Rapid Support Forces (RSF) kwa kufanya matukio takribani 500 ya ubakaji dhidi ya wanawake tangu vita vya wenyewe kwa wenyewe nchini Sudan vilipoanza Aprili 2023.

“Kuna takribani kesi 500 za ubakaji zimerekodiwa rasmi na serikali na mashirika ya haki za binadamu, kutoka kwa wanawake waliofanyiwa vitendo hivyo katika maeneo yaliyovamiwa na wanamgambo wa [RSF],” Shirika la Habari Suna, linaloendeshwa na serikali ya Sudan liliripoti jana.

“Wanamgambo hutumia ubakaji kama silaha ya vita kuwalazimisha raia kuhama vijiji na makazi yao, ili kuwaweka mamluki wake na kuziadhibu jamii zinazokataa uwepo wao,” inasema ripoti hiyo.

Wizara hiyo inaishutumu RSF kwa utekaji nyara na kuwashikilia mateka mamia ya wanawake na kuwatumikisha kingono na kazi za nyumbani za kulazimishwa.

Ripoti hiyo imekosoa kutojali kwa jumuiya ya kimataifa juu ya ukatili wa RSF dhidi ya wanawake. Na inasema ukatili wao “umezidi ule uliofanywa na Daesh [IS] na Boko Haram na Uganda Lord’s Resistance Army.”

Wizara hiyo imetoa wito wa kuchukuliwa hatua dhidi ya RSF na nchi zinazoiunga mkono RFS, na kuziita nchi hizo ni “washirika katika uhalifu huu.”

Umoja wa Mataifa na mashirika ya kutetea haki za binadamu mara kwa mara yamekuwa yakiishutumu RSF kwa kufanya ukatili, ikiwa ni pamoja na ubakaji.

Kundi hilo linakanusha madai hayo.

Wanne wafariki katika ghasia za uchunguzi kuhusu msikiti nchini India

Mji wa kaskazini mwa India wa Sambhal uko katika hali ya tahadhari baada ya watu wanne kufariki na makumi ya wengine kujeruhiwa katika mapigano makali katika msikiti wa Karne siku ya Jumapili.

Mapigano yalizuka kati ya waandamanaji na polisi wakati wa uchunguzi uliofuatiliwa na mahakama wa Shahi Jama Masjid (msikiti), mnara wa Karne ya 16 unaolindwa na serikali.

Mamlaka katika jimbo la Uttar Pradesh, ambako Sambhal iko, wamesajili kesi nne kuhusiana na ghasia hizo na wamesimamisha huduma za mtandao na kufunga shule katika eneo hilo kwa siku moja.

Uchungizi huo uliamriwa na mahakama ya eneo hilo wiki jana, saa chache baada ya ombi kudai kuwa msikiti huo ulikuwa umejengwa kwenye eneo la hekalu lililoharibiwa.

Video na picha za mapigano hayo zilizosambazwa kwenye mitandao ya kijamii zinaonesha makobazi, matofali na mawe yakiwa yametapakaa katika msikiti huo.

Waandamanaji wanadai kuwa wanaume wanne walipigwa risasi na polisi lakini mamlaka imekanusha hilo.

“Hakuna silaha iliyotumiwa ambayo inaweza kuchukua maisha ya mtu yeyote,” Msimamizi wa Polisi Krishan Kumar aliambia gazeti la Hindu.

Mzozo katika Msikiti wa Shahi Jama ni wa hivi karibuni zaidi katika msururu wa mizozo karibu na misikiti nchini humo, ambapo makundi ya Wahindu yamedai kuwa watawala wa Mughal waliharibu mahekalu ili kuyajenga.

Kesi zinazohusu madai hayo kwa sasa zinapigwa vita na makundi ya Waislamu katika mahakama mbalimbali.

Huko Sambhal, mvutano umekuwa ukitokota tangu Jumanne, baada ya mahakama ya eneo hilo kuamuru uchunguzi uliorekodiwa kwa video kuhusu Masjid ya Jama.

Utafiti huo uliamriwa saa chache baada ya maombi kudai kuwa msikiti huo ulijengwa baada ya mtawala wa Mughal Babur kuharibu hekalu la Hari Har katika miaka ya 1520.

Mamlaka huko Uttar Pradesh, ambayo inasimamiwa na Chama cha Bharatiya Janata (BJP), walifanya uchunguzi wa awali wa msikiti siku hiyohiyo.

Mtu mmoja afariki dunia, watatu wajeruhiwa katika ajali ya ndege ya mizigo Lithuania

Mtu mmoja amefariki dunia na wengine watatu kujeruhiwa baada ya ndege ya mizigo kuanguka karibu na uwanja wa ndege wa Vilnius nchini Lithuania alfajiri ya Jumatatu.

Ndege hiyo, inayoendeshwa kwa DHL na shirika la ndege la Uhispania la Swiftair, ilianguka karibu na nyumba wakati ilikuwa inakaribia kutua, mamlaka za eneo zilisema.

Watu wote 12 wameondolewa salama kutoka kwenye maeneo karibu na eneo la ajali, polisi walisema.

Huduma za uokoaji zilisema wale wote waliokuwa kwenye ndege kutoka Leipzig, Ujerumani, wamepatikana.

Ndege hiyo iliondoka kwenye kituo cha DHL kwenye Uwanja wa Ndege wa Leipzig baada ya saa 3:00 saa za ndani (02:00 GMT) na kuanguka karibu saa moja na nusu baadaye, kulingana na data kutoka kwa tovuti ya ufuatiliaji wa ndege ya Flightradar24.

Zima moto walionekana wakikabiliana na moshi kutoka kwenye jengo lililo kilomita 1.3 (maili 0.8) kaskazini mwa barabara ya kurukia ndege, shirika la habari la Reuters liliripoti.

Chanzo cha ajali hiyo hakijajulikana na mamlaka ya Lithuania imeanza uchunguzi.

Mkuu wa kitengo cha kuzima moto na huduma za dharura nchini Lithuania, Renatas Pozela, alisema ndege hiyo ilipaswa kutua katika uwanja wa ndege wa Vilnius na “ilianguka kilomita chache kutoka eneo hilo”.

Muingereza atekwa akiipigania Ukraine

Mwanaume mmoja raia wa Uingereza amekamatwa na vikosi vya Urusi alipokuwa akipigania Ukraine, kulingana na ripoti.

Katika video inayosambaa mtandaoni, mwanaume aliyevalia mavazi ya kijeshi anajitambulisha kama James Scott Rhys Anderson, 22, na anasema aliwahi kuwa katika Jeshi la Uingereza.

Shirika la habari la serikali ya Urusi, Tass linanukuu chanzo cha kijeshi kikisema kwamba kile wanachokiita “mamluki wa Uingereza” “alichukuliwa mateka katika eneo la Kursk” nchini Urusi, sehemu ambayo Ukraine imekuwa ikishikiliwa tangu ilipoanzisha mashambulizi ya kushtukiza mwezi Agosti.

Wizara ya Mambo ya Nje ilisema “inaunga mkono familia ya Muingereza kufuatia ripoti za kuzuiliwa kwake”.

Katika video hiyo, iliyotumwa kwa mara ya kwanza kwenye jukwaa la ujumbe wa Telegram, Bwana Anderson anamwambia mtu anayemhoji kutoka nyuma ya kamera kwamba alihudumu kama mtu binafsi katika Jeshi la Uingereza kutoka 2019 hadi 2023.

Anasema alijiunga na Jeshi la Kimataifa la Ukraine, kitengo cha kijeshi kinachoundwa na wanaojitolea wa kigeni, baada ya kupoteza kazi yake na kuona ripoti kwenye televisheni kuhusu vita.

Anasema alisafiri kwa ndege hadi Krakow nchini Poland kutoka Luton na kusafiri kutoka huko kwa basi hadi mpaka wa Ukraine.

Ukraine ilianzisha shambulio la kushtukiza mjini Kursk tarehe 6 Agosti, likisonga mbele hadi maili 18 (29km) na kuchukua udhibiti wa karibu kilomita za mraba 1,000 za eneo la Urusi.

Urusi imetuma takribani wanajeshi 50,000 katika eneo hilo, na imeanza kutwaa tena maeneo hayo huku kukiwa na mapigano makali.

Hezbollah yarusha makombora ndani ya Israel baada ya shambulizi la Beirut

Jeshi la Israel linasema takribani roketi 250 zimerushwa na Hezbollah kuvuka mpaka kutoka Lebanon, na kuashiria moja ya mashambulizi makali zaidi ya Israel tangu mapigano yalipozidi mwezi Septemba.

Watu kadhaa walijeruhiwa na majengo kuharibiwa kaskazini na kati mwa Israel, baadhi yao wakiwa karibu na Tel Aviv, polisi wa Israel walisema.

Mashambulizi hayo yalifuatia shambulizi la anga la Israel katikati mwa Beirut siku ya Jumamosi, ambapo wizara ya afya ya Lebanon ilisema watu 29 waliuawa.

Pia siku ya Jumapili vyombo vya habari vya Israel viliripoti kwa wingi kuwa Israel na Lebanon zinaelekea kwenye makubaliano ya kusitisha mapigano ili kumaliza mapigano na wanamgambo wanaoungwa mkono na Iran, Hezbollah.

Kufuatia mashambulizi makali kutoka Lebanon, polisi wa Israel wamesema kuwa wamepokea taarifa za vifusi vya roketi kuanguka katika eneo la Tel Aviv.

Jeshi la Ulinzi la Israel (IDF) lilisema shambulio la moja kwa moja katika kitongoji kimoja limeacha “nyumba zikiteketea na magofu”.

Roketi zilianguka katika Petah Tikva, karibu na Tel Aviv, na katika baadhi ya maeneo ya kaskazini: Haifa, Nahariya na Kfar Blum, vyombo vya habari vya Israeli viliripoti.

Hezbollah, ambayo hapo awali iliapa kujibu mashambulizi dhidi ya Beirut kwa kulenga Tel Aviv, ilisema kuwa ilirusha makombora ya katika maeneo mawili ya kijeshi katika mji huo na jirani.

Baadaye, IDF ilisema ilikuwa imekamilisha mashambulizi kwenye vituo 12 vya kamandi vya Hezbollah huko Dahieh, ngome ya kundi hilo katika vitongoji vya kusini mwa Beirut.

Wizara ya afya ya Lebanon siku ya Jumapili iliongeza idadi ya vifo kutoka 20 hadi 29 kutokana na shambulizi kubwa la Israeli liliioanzishwa bila ya onyo katikati mwa Beirut. Ilisema jumla ya watu 84 waliuawa nchini humo siku ya Jumamosi.

Takribani watu 24 wapoteza maisha baada ya boti mbili kuzama pwani ya Madagascar

Takribani watu 24 wamefariki baada ya boti mbili zilizokuwa zimewabeba raia wengi wa Somalia kupinduka katika pwani ya Madagascar, mamlaka za eneo zilisema.

Taarifa kutoka Wizara ya Mambo ya Nje ya Somalia ilisema juhudi zinaendelea “kuhakikisha kuwa manusura wanarejea salama”.

Boti hizo mbili zilibeba jumla ya abiria 70.

Ziligunduliwa zikiwa ziko karibu na pwani ya kaskazini mwa Madagascar siku ya Jumamosi katika Bahari ya Hindi.

Inaaminika injini zao zilifeli. Afisa mkuu wa serikali ya Somalia aliviambia vyombo vya habari vya ndani kuwa manusura waliokolewa na wavuvi.

Walionusurika wanasema walikuwa wakijaribu kufikia kisiwa cha Ufaransa cha Mayotte, njia ya kawaida lakini hatari kwa wahamiaji wa Kisomali wanaotafuta hifadhi.

Ukosefu wa ajira na umaskini katika Pembe ya Afrika unawalazimu vijana wengi kuchukua njia hatari ya kufika Ulaya kwa matumaini ya maisha bora.

Mamlaka ya Madagascar ilionya dhidi ya “hatari kali zinazohusiana na uhamiaji haramu” ikipendekeza waathiriwa wa janga hilo walikuwa wahamiaji.

Makumi ya watu wauawa katika ghasia za kidini Pakistan

Mamlaka ya Pakistani inasema kuwa wameafikiana kuhusu kusitisha mapigano kwa siku saba baada ya zaidi ya watu 80 kuuawa katika ghasia za kidini zilizozuka tena kaskazini-magharibi mwa nchi hiyo.

Wengine 156 wanasemekana kujeruhiwa katika siku tatu za mapigano katika wilaya ya Kurram, karibu na mpaka wa Afghanistan.

Ghasia hizo zilianza siku ya Alhamisi, wakati watu wenye silaha waliposhambulia misafara ya Waislamu wa madhehebu ya Shia waliokuwa wakisafiri katika eneo hilo chini ya ulinzi wa polisi. Zaidi ya watu 40 walikufa katika tukio hilo, ambalo lilisababisha mashambulizi ya kulipiza kisasi.

Waislamu wa madhehebu ya Shia na Sunni wamejihusisha katika mizozo ya kikabila na kimadhehebu kuhusu migogoro ya ardhi kwa miongo kadhaa.

Baada ya mazungumzo siku ya Jumapili, msemaji wa serikali Muhammad Ali Seif alisema kuwa viongozi wote wa Shia na Sunni wamekubali kusitisha ghasia, Reuters na mashirika ya habari ya AFP yaliripoti.

Siku ya Jumapili afisa wa utawala wa eneo hilo aliiambia AFP: “Mapigano na mashambulizi ya msafara mnamo Novemba 21, 22, na 23 yamesababisha vifo vya watu 82 na majeruhi 156.” Akizungumza kwa sharti la kutotajwa majina, alisema kuwa watu 16 kati ya waliofariki ni Sunni na 66 ni wa jamii ya Shia.

Waliouawa katika mashambulizi ya Alhamisi kwenye misafara ni pamoja na wanawake na watoto. Abiria Saeeda Bano alieleza kwa BBC idhaa ya Urdu jinsi alivyohofia kuuawa alipokuwa akijificha chini ya viti vya gari pamoja na watoto wake.

Mamia ya wakazi walikimbia huku kukiwa na ongezeko la ghasia Ijumaa na Jumamosi.

Kombora la masafa marefu linaloweza kurushwa kutoka bara moja hadi jingine ni la aina gani?

Dakika 42 zilizopita

Kulingana na Rais wa Ukraine Volodymyr Zelensky, Urusi inatumia ardhi ya Ukraine kama uwanja wa majaribio ya silaha zake.

“Maelezo yote, ikiwa ni pamoja na kasi na urefu, yanalingana na sifa za kombora la masafa marefu la ICBM,” Zelenskiy alisema baada ya shambulio la Alhamisi asubuhi kwenye jiji la mashariki mwa Ukraine la Dnipro.

Maafisa kadhaa wa nchi za Magharibi wameelezea mashaka yao kuhusu matumizi ya kombora la masafa marefu .

Hii ni mara ya kwanza kwa kombora hilo kutumika katika vita vya kijeshi duniani baada ya Marekani kuthibitisha .

Sasa swali ni je, makombora ya masafa marefu yanayoweza kurushwa kutoka bara moja hadi jingine ni ya aina gani na kwa nini matumizi yake ni muhimu sana?

Kombora la masafa marefu linaloweza kurushwa kutoka bara moja hadi jingine ni la aina gani?

Kama jina la ICBM linavyopendekeza, silaha hizi zimeundwa kurusha makombora kwa umbali mrefu sana.

Kila kombora linaweza kubeba makombora kadhaa, ambayo yanaweza kujitegemea na kulenga shabaha tofauti.

Umoja wa Kisovyeti ilikuwa nchi ya kwanza kufanya majaribio ya ICBM mnamo Agosti 1957. Lakini leo, Urusi, Marekani na Uchina pia zina silaha kubwa za ardhini za makombora haya. Nchi kama vile Uingereza, Ufaransa, India, Israel na Korea Kaskazini pia zina idadi ndogo ya makombora haya yanayoweza kurushwa kupitia nyambizi.

Makombora ya masafa marefu yanaweza kusafiri masafa marefu na kuwa na kasi zaidi ikilinganishwa na makombora mengine yenye uwezo kama huo.

Je, makombora haya yanaweza kuruka kwa umbali gani?

Kulingana na ufafanuzi wa kawaida, kombora la masafa marefu lazima liwe na kiwango cha chini cha kilomita 5500. Bila shaka, baadhi ya makombora haya yanaweza kusafiri umbali mkubwa zaidi.

Inaaminika kuwa kombora lililorushwa na Urusi lilirushwa kutoka mkoa wa Astrakhan kusini mwa nhi hiyo.

Makombora ya balestiki ya Urusi yanaweza kusafiri zaidi ya kilomita 10,000. Hii ina maana kwamba makombora yanayorushwa kutoka eneo hili yanaweza kinadharia kufika Pwani ya Mashariki ya Marekani.

Je, makombora haya yana kasi ya kiwango gani?

Inaaminika kuwa Urusi ilitumia kombora la RS-26 Rubzh katika shambulio la Dnipro. Makombora haya yana kasi ya kilomita 24,500 kwa saa, ambayo ni takriban kilomita 7 kwa sekunde.

Yanaitwa makombora ya balestiki kwa sababu yanarushwa kwa nguvu ya roketi hadi kwenye njia ya juu ya angahewa na kisha kushuka kuelekea kwenye shabaha.

Ni kutokana na hatua hiyo inalolipa kombora hilo kasi ya juu sana. Teknolojia hiyo pia huyafanya kuwa vigumu kudunguliwa ikilinganishwa na makombora ya cruise, ambayo hayana kasi kubwa na husafiri kwa njia ya tambarare.

Je, makombora ya masafa marefu ni makombora ya nyuklia?

Mkombora ya ICBM yanaweza kubeba vichwa vya nyuklia au vichwa vya makombora ya kawaida.

Bila shaka, hakuna dalili kwamba kombora lililorushwa na Urusi lilikuwa limebeba kichwa cha nyuklia.

Jeshi la anga la Ukraine lilitangaza kuwa silaha hiyo ililenga shabaha “bila matokeo”. lakini, hawakutoa habari yoyote juu ya kiwango cha uharibifu au uwezekano wa majeruhi

Je, unahitaji gharama ya pesa ngapi kumiliki kombora moja la masafa marefu?

Haijulikani ni kiasi gani Urusi inatumia katika mpango wake wa makombora ya balestiki , lakini habari kuhusu matumizi ya Marekani inapatikana.

Mwezi Julai, Pentagon iliidhinisha mpango mpya wa kuunda makombora ya balestiki kwa bajeti ya $140 bilioni.

Ripoti zinaonyesha kuwa gharama ya kuunda kombora moja la masafa marefu imefikia dola milioni 162.

Silaha hizi zinachukuliwa kuwa ghali sana kwa viwango vyovyote na katika nchi zote.

Kwanini Urusi ililitumia kombora hilo wakati huu?

Zaidi ya siku 1,000 zimepita tangu uvamizi mkubwa wa Urusi nchini Ukraine

Kutumwa kwa wanajeshi wa Korea Kaskazini katika eneo la Kursk nchini Urusi, ambako Waukraine walikuwa wameteka zaidi ya kilomita za mraba 1,000 katika shambulio la mwaka 2024, kuliashiria ongezeko kubwa la vita.

Labda kwa sababu hii, kwa mara ya kwanza, Rais Biden aliidhinisha matumizi ya mfumo wa makombora wa Atcoms kushambulia shabaha ndani ya Urusi.

Makombora ya Scallop ya Uingereza na Ufaransa pia yamerushwa kwenye shabaha ndani ya Urusi.

Hapo awali Urusi ilionya kwamba ikiwa Ukraine itatumia makombora ya masafa marefu kushambulia eneo lake, itatoa jibu “linalofaa”.

Jibu hilo linajiri huku rais mteule Donald Trump akijiandaa kurejea Ikulu ya White House.

Trump ameahidi kumaliza vita nchini Ukraine ndani ya saa 24, ingawa haijabainika wazi jinsi anavyopanga kufanya hivyo.

All Rights Reserved © Cantona Group PLC||2024