Radio Fortune Africa -Ukweli na Burudani

https://zeno.fm/radio/radio-fortune-africa

Na : Cantona Joseph|RFA

Shirika la Afya Duniani (WHO) limeripoti kuwa wapiganaji wa RSF wamewaua takribani watu 460 katika Hospitali ya Saudi mjini El-Fasher, siku chache baada ya kundi hilo kuteka jiji hilo lililokuwa ngome ya mwisho ya jeshi la Sudan katika eneo la Darfur.

Mkurugenzi Mkuu wa WHO, Dkt. Tedros Adhanom Ghebreyesus, amesema shirika hilo “limehuzunishwa na kushtushwa kwa kiwango kikubwa” kufuatia ripoti za mauaji hayo ya raia ndani ya kituo cha matibabu.

“Tunasikitishwa na ukatili huu unaokiuka misingi ya ubinadamu na maadili ya kimataifa ya huduma za afya. Hospitali hazipaswi kamwe kuwa uwanja wa vita,” alisema Dkt. Tedros kupitia ukurasa wake wa X (zamani Twitter).

Kwa mujibu wa Mtandao wa Madaktari wa Sudan (Sudan Doctors’ Network), wapiganaji wa RSF waliingia hospitalini Jumanne na “kuwaua kwa ukatili wagonjwa, walezi wao, na mtu yeyote aliyekuwapo ndani ya jengo hilo.”

Taarifa hiyo iliongeza kuwa vituo vingi vya afya katika jiji la El-Fasher “vimegeuzwa kuwa kichinjio cha kibinadamu,” huku huduma za matibabu zikisimama kutokana na hofu na ukosefu wa wahudumu.

Aidha, mtandao huo umewatuhumu wapiganaji wa RSF kwa kuwateka wahudumu sita wa afya wakiwemo madaktari wanne, mfamasia mmoja na muuguzi mmoja na kudai fidia ya zaidi ya dola 150,000 za Kimarekani kwa kuwaachilia huru.

Kamati ya Upinzani ya El-Fasher (El-Fasher Resistance Committee) pia imethibitisha shambulio hilo, ikieleza kuwa “kulitanda ukimya wa kutisha” baada ya mauaji hayo, huku miili ya waathirika ikiachwa ndani ya wodi kwa saa kadhaa.

El-Fasher, ambayo ilikuwa ngome ya mwisho ya jeshi la Sudan katika eneo la Darfur, ilidhibitiwa rasmi na RSF siku ya Jumapili baada ya mizingiro ya miezi 18 iliyosababisha njaa kali, uhaba wa dawa, na mashambulizi ya anga ya mara kwa mara.

Mashirika ya kibinadamu yameonya kuwa tukio hili linaweza kuwa moja ya mauaji mabaya zaidi ya raia tangu vita vya wenyewe kwa wenyewe vianze Aprili 2023, kati ya Jeshi la Sudan (SAF) na RSF, vilivyokuwa vikishindania udhibiti wa taifa hilo la Kaskazini mwa Afrika.

All Rights Reserved © The Cantona Group PLC||2025